ಬೆಂಗಳೂರಿನಲ್ಲಿ ನಡೆದ “ಒಕ್ಕೂಟ ವ್ಯವಸ್ಥೆಯಲ್ಲಿ ಪ್ರಾದೇಶಿಕ ಪಕ್ಷಗಳ ಪ್ರಸ್ತುತತೆ” ಚಿಂತನ ಗೋಷ್ಠಿ: ಒಂದು ವರದಿ

ಒಕ್ಕೂಟ ವ್ಯವಸ್ಥೆಯಲ್ಲಿ ಪ್ರಾದೇಶಿಕ ಪಕ್ಷಗಳ ಪ್ರಸ್ತುತತೆ ಎಂಬ ಚಿಂತನ ಗೋಷ್ಠಿ ಹೋದ ವಾರ ಬೆಂಗಳೂರಿನ ಭಾರತೀಯ ವಿದ್ಯಾ ಭವನದಲ್ಲಿ ನಡೆಯಿತು. ಈ ಕಾರ್ಯಕ್ರಮವನ್ನು ಬೆಂಗಳೂರಿನ ಮುನ್ನೋಟ ಪುಸ್ತಕ ಮಳಿಗೆ ಮತ್ತು ಐಟಿ ಕನ್ನಡ ಕೂಟವು ಜಂಟಿಯಾಗಿ ಹಮ್ಮಿಕೊಂಡಿದ್ದವು.  ಅದರ ಬಗ್ಗೆ ಪತ್ರಿಕೆಗಳಲ್ಲಿ ನಾಲ್ಕು ಸಾಲು ಸಹ ಸರಿಯಾಗಿ ಯಾರೂ ಬರೆಯಲಿಲ್ಲ.  ಮಧ್ಯದ ಪುಟದಲ್ಲಿ ಎಲ್ಲೋ ಮೂಲೆಯಲ್ಲಿ ಸಾರವಿಲ್ಲದ ಸಾರಾಂಶವನ್ನು ಗೀಚುವ ಪತ್ರಿಕೆಗಳನ್ನು ನೋಡುವ ಅಗತ್ಯವಿಲ್ಲ. ಇಂಥ ಮುಖ್ಯವಾದ ವಿಚಾರವನ್ನು ಪತ್ರಿಕೆಗಳು ವರದಿ ಮಾಡುವ ವಿಧಾನವನ್ನು ಮೂದಲಿಸುವ ಗೋಜಿಗೆ ಹೋಗದೆ ನಾನು ಆವತ್ತು ಕೇಳಿಸಿಕೊಂಡ ವಿಚಾರಗಳನ್ನು ಇಲ್ಲಿ ನಿಮ್ಮ ಮುಂದಿಡುತ್ತಿದ್ದೇನೆ.  ಮುಖ್ಯ ಅಂಶಗಳಲ್ಲಿ  ನೆನಪಿನಲ್ಲಿರುವುದನ್ನು ಮಾತ್ರ ಬರೆಯುತ್ತಿದ್ದೇನೆ. ಯಾವ ನೋಟ್ಸ್ ಮಾಡಿಕೊಳ್ಳಲಿಲ್ಲ, ಯಾವುದನ್ನೂ ರಿಕಾರ್ಡ್ ಮಾಡಿಕೊಳ್ಳಲಿಲ್ಲ.  ಕಾರ್ಯಕ್ರಮ ನಡೆದು ಒಂದು ವಾರ ಕಳೆದಮೇಲೂ ನನ್ನ ನೆನಪಿನಲ್ಲಿ ಕೆಲವು ಅಂಶಗಳು ಉಳಿದಿವೆ ಎಂದರೆ ಅವು ಪರಿಣಾಮ ಬೀರಿದೆ ಎಂದು ಹೇಳಬಹುದು.

okkoota-pradeshika-BVB-May18-2017
Relevance of Regional Political Parties in the Indian Union- A discussion in Bengaluru, held on May 18, 2017,

ಸಭೆಗೆ ಮುಖ್ಯ ಅತಿಥಿಯಾಗಿ ಬಂದಿದ್ದವರು ಎಚ್ ಡಿ ದೇವೇಗೌಡರು. ಸುಮಾರು ಒಂದೂವರೆ ತಾಸು ತಡವಾಗಿ ಬಂದು ಕ್ಷಮೆ ಕೇಳಿದರು. ಅವರಿಂದ ಕಾರ್ಯಕ್ರಮ ಸಂಜೆ ೪ ಗಂಟೆಗೆ ಶುರುವಾಗಬೇಕಾಗಿದ್ದುದು ೫:೪೫ ಕ್ಕೆ ಶುರುವಾಯ್ತು. ಮುನ್ನೋಟದ ವಸಂತ ಶೆಟ್ಟಿ ಪ್ರಾಸ್ತಾವಿಕವಾಗಿ ಸುಮಾರು ಹದಿನೈದು ನಿಮಿಷ ಮಾತಾಡಿ, “ಕರ್ನಾಟಕಕ್ಕೆ ಈವತ್ತು ನಾಡು-ನುಡಿಯ ನಾಡಿ ಮಿಡಿತ ಬಲ್ಲ ಪ್ರಾದೇಶಿಕ ಪಕ್ಷವೊಂದರ ಅಗತ್ಯ ಯಾಕೆ ಇದೆ” ಎಂಬ ವಿಷಯಕ್ಕೆ ಪಾಯ ಹಾಕಿ ಕೊಟ್ಟರು.  ಹಿಂದಿ ಹೇರಿಕೆ, ಕೇಂದ್ರ ಸರ್ಕಾರಿ ಕೆಲಸಗಳಲ್ಲಿ ಕನ್ನಡಿಗರ ಅವಗಣನೆ, ನೀರಾವರಿ ಮತ್ತು ಶಿಕ್ಷಣ ಕ್ಷೇತ್ರಗಳಲ್ಲಿ ಕರ್ನಾಟಕದ ಸ್ವಾಯತ್ತತೆಯು ಸಾಯುತ್ತಿರುವ ಬಗೆಯನ್ನು ಶೆಟ್ಟಿ ಗಟ್ಟಿಯಾಗಿ ಹೇಳಿದರು. ಅವರ ನಂತರ ವಕೀಲ-ರಾಜಕಾರಣಿ ಬಿ.ಎಲ್. ಶಂಕರ್ ಸುಮಾರು ೪೦ ನಿಮಿಷ ನಿರರ್ಗಳವಾಗಿ ವಿಷಯದ ಹಲವು ಆಯಾಮಗಳ ಕುರಿತು ಮಾತಾಡಿದರು. ಅವರು ಹೇಳಿದ ಅಂಶಗಳು…

  • ಭಾರತದ ಸಂವಿಧಾನದ ತಕ್ಕಡಿಯಲ್ಲಿ ಕೇಂದ್ರ ಸರ್ಕಾರದ ಬೊಟ್ಟು ರಾಜ್ಯ ಸರ್ಕಾರಗಳ ಬೊಟ್ಟಿಗಿಂತ ಹೆಚ್ಚು ತೂಗುತ್ತದೆ. ಸಂವಿಧಾನದ ತಿದ್ದುಪಡಿ ಮಾಡಲು ಲೋಕಸಭೆಗೆ ಅಧಿಕಾರವಿದೆ. ಲೋಕಸಭೆಯಲ್ಲಿ ೨/೩ ರ ಬಹುಮತದೊಂದಿಗೆ ಭಾರತ ಒಕ್ಕೂಟದ ಶೇಕಡಾ ೫೦ ರಾಜ್ಯಗಳು ಒಪ್ಪಿದರೆ ಸಾಕು, ಯಾವ ಬದಲಾವಣೆಯನ್ನು ಬೇಕಾದರೂ ತರಬಹುದು (ಉದಾ: GST ಮಸೂದೆ / ಕಾಯ್ದೆ). ರಾಜ್ಯ ಸರ್ಕಾರಗಳು ತಿದ್ದುಪಡಿಗಳನ್ನು ಸೂಚಿಸಲು ಕೂಡ ಅಶಕ್ತವಾಗಿವೆ.
  • ಒಕ್ಕೂಟ ವ್ಯವಸ್ಥೆಯಲ್ಲಿ ರಾಜ್ಯಗಳು ಕೇಂದ್ರದಷ್ಟೇ ಬಲಿಷ್ಠವಾಗುವ ತನಕ “ಫೆಡರಲಿಸಂ” ಪದದ ನಿಜವಾದ ಅರ್ಥ “ಟ್ರೀಟಿ ಅಥವಾ ಒಪ್ಪಂದ” ಕ್ಕೆ ನ್ಯಾಯ ಸಿಗದು.
  • ಕನ್ನಡೇತರ ಐಎಎಸ್ ಅಧಿಕಾರಿಗಳಿಂದ, ಸ್ವಂತ ಬುದ್ಧಿ ಇಲ್ಲದ ರಾಜಕಾರಣಿಗಳಿಂದ ಕರ್ನಾಟಕಕ್ಕೆ ಕಂಟಕ ಬಂದಿದೆ

ಇದರ ನಂತರ ಪತ್ರಕರ್ತ ಎನ್. ಎ. ಇಸ್ಮಾಯಿಲ್ ಅವರು ಹಿಂದಿ ಹೇರಿಕೆಯ ಬಗ್ಗೆ ಚುಟುಕಾಗಿ ಆದರೆ ಮೊನಚಾಗಿ ಮಾತಾಡಿದರು.  “ಹಿಂದಿ ಭಾಷೆಯ ಬಗ್ಗೆಯಾಗಲೀ ಅಥವಾ ಬಾಲಿವುಡ್ ಸಿನೆಮಾ ಬಗ್ಗೆಯಾಗಲೀ ದಕ್ಷಿಣ ರಾಜ್ಯಗಳಲ್ಲಿ ಎಂದೂ ಹೆದರಿಕೆ ಇರಲಿಲ್ಲ. ಕೇಂದ್ರ ಸರ್ಕಾರದ ಹಿಂದಿ ಹೇರುವ ನೀತಿಗೆ ಕೇಂದ್ರ ಸರ್ಕಾರದ ರಾಜಕೀಯ ಅಸುರಕ್ಷಿತ ಭಾವನೆ ಅಥವಾ ಪೊಲಿಟಿಕಲ್ ಇನ್ಸೆಕ್ಯೂರಿಟಿಯೇ ಮುಖ್ಯವಾದ ಕಾರಣ” ಎಂದು ಇಸ್ಮಾಯಿಲ್ ಹೇಳಿದರು. ” ಹಿಂದಿ ಹೇರಿಕೆ ಒಂದು ರಾಜಕೀಯ ತಂತ್ರ. ಅದನ್ನು ಎದುರಿಸಲು ನಾಡು-ನುಡಿಯ ಬಗ್ಗೆ ಕಾಳಜಿ  ಇರುವ ರಾಜಕೀಯ ಹೋರಾಟ ಬೇಕಾಗಿದೆ” ಎಂದು ಅವರು ಹೇಳಿದಾಗ ಪ್ರೇಕ್ಷಕರು ಕರತಾಡನ ಮಾಡಿ ಒಪ್ಪಿಗೆ ಸೂಚಿಸಿದರು.

“ರಾಷ್ಟ್ರೀಯ ಪಕ್ಷಗಳಿಂದ ರಾಜ್ಯಗಳಿಗೆ ಆಗಿರುವ ನ್ಯಾಯಾನ್ಯಾಯಗಳು” ಎಂಬ ವಿಚಾರವಾಗಿ ಮಾತನಾಡಿದವರು ಶಿಕ್ಷಕ-ರಾಜಕಾರಣಿ ವೈ.ಎಸ್.ವಿ. ದತ್ತ. ಇವರ ಮಾತಿಗೆ ಸಮಯದ ಅಭಾವ ಉಂಟಾಗಿತ್ತು.  ಹಾಗಾಗಿ, ಇವರು ವಿವರಗಳಿಗೆ ಹೋಗದೆ ಸೂಚ್ಯವಾಗಿ ಕೆಲವು ಉದಾಹರಣೆಗಳನ್ನು ಸ್ವಾರಸ್ಯಪೂರ್ಣವಾಗಿ ಪಟ್ಟಿ ಮಾಡಿದರು.  ಕೊಟ್ಟ ಉದಾಹರಣೆಗಳೆಲ್ಲವೂ ಸೂಕ್ತವಾಗಿದ್ದುವು ಮತ್ತು ಕರ್ನಾಟಕಕ್ಕೆ ಸೀಮಿತವಾಗಿರಲಿಲ್ಲ.  ಬಲಿಷ್ಠ ಪ್ರಾದೇಶಿಕ ನೇತೃತ್ವ ಇದ್ದಾಗ ಕೇಂದ್ರವು ರಾಜ್ಯದ ಪಾದಸೇವೆಗೆ ದೌಡಾಯಿಸುತ್ತಾ ಬಂದಿದೆ ಎಂದು ಅವರು ಕಾವೇರಿ ನ್ಯಾಯಮಂಡಳಿ ರಚನೆ ಮಾಡುವಾಗ (ತಮಿಳಿನಾಡಿನಲ್ಲಿ) ನಡೆದ ಬೆಳವಣಿಗಳನ್ನು ಉದಾಹರಿಸಿದರು.  ಎಚ್. ಡಿ. ದೇವೇಗೌಡರು, ದೇಶದ ಪ್ರಧಾನಿ ಆಗಿದ್ದಾಗ (ಯುನೈಟೆಡ್ ಫ್ರಂಟ್ ಸರ್ಕಾರ) ಕರ್ನಾಟಕದ ಕೃಷ್ಣಾ ಮೇಲ್ದಂಡೆ ಯೋಜನೆಗೆ ಅನುಕೂಲ ಮಾಡಿಕೊಡುವ ಸಲುವಾಗಿ, ಹಣಕಾಸಿನ ಕೊರತೆಯಿಂದ ನೆನೆಗುದಿಗೆ ಬಿದ್ದಿದ್ದ ದೇಶದ ಎಲ್ಲಾ ನೀರಾವರಿ ಯೋಜನೆಗಳಿಗೂ ಹಣ ಒದಗಿಸುವ ನಿಷ್ಪಕ್ಷಪಾತ ನಿರ್ಧಾರ ತೆಗೆದುಕೊಂಡರು ಎಂದು ಸ್ಮರಿಸಿದರು. ಆದರೆ, ದತ್ತ ಅವರು ತೆಗೆದುಕೊಂಡ ಬಹುತೇಕ ಉದಾಹರಣೆಗಳು ನೀರಾವರಿಗೆ ಸಂಬಂಧಿಸಿದ್ದೇ ಆಗಿದ್ದರಿಂದ ಕೊಟ್ಟ ವಿಷಯಕ್ಕೆ ನ್ಯಾಯ ಸಿಗಲಿಲ್ಲವೇನೋ ಎನಿಸಿತು.

ಇವಿಷ್ಟೂ ಚರ್ಚೆಗೆ ಪ್ರತಿಕ್ರಿಯೆ ಕೊಡುವ ಜವಾಬ್ದಾರಿ ದೇವೇಗೌಡರ ಮೇಲಿತ್ತು.  ಅವರು ತಮ್ಮ ರಾಜಕೀಯ ಸ್ಥಾನಕ್ಕೆ ತಕ್ಕುದಾದ ರೀತಿಯಲ್ಲಿ ಯಾರನ್ನೂ ವೈಯಕ್ತಿಕವಾಗಿ ದೂಷಿಸುವುದಕ್ಕೆ ಹೋಗಲಿಲ್ಲ. ಕಾವೇರಿ ವಿಚಾರದಲ್ಲಿ ರಾಜ್ಯ ರಾಜಕಾರಣವು ಒಗ್ಗಟ್ಟಾಗಿ ನಿಲ್ಲುವ ಸಂದರ್ಭದಲ್ಲಿ ದೇವೇಗೌಡರು ನಡೆದುಕೊಂಡ ಸಮಯೋಚಿತ ರೀತಿಯನ್ನು ಸಭೆಯಲ್ಲಿದ್ದವರೆಲ್ಲರೂ ಭಾರೀ ಕರತಾಡನದೊಂದಿಗೆ ಶ್ಲಾಘಿಸಿದರು. ಕೇಂದ್ರದಲ್ಲಿರುವ ಈಗಿನ ಸರ್ಕಾರದ ಕಾರ್ಯವೈಖರಿಯನ್ನು ಟೀಕಿಸುವುದಕ್ಕೆ ದೇವೇಗೌಡರು ಹಿಂಜರಿಯಲಿಲ್ಲ. ಆದರೆ, ಕಾರ್ಯಕ್ರಮದಲ್ಲಿ ಇತರರು ಮಂಡಿಸಿದ್ದ ವಿಚಾರಕ್ಕೆ ನೇರವಾಗಿ ಪ್ರತಿಕ್ರಿಯೆ ಕೊಡಲು ಅವರಿಗೆ ಸಾಧ್ಯವಾಗಲಿಲ್ಲ. ತಮ್ಮ ರಾಜಕೀಯ ಜೀವನದಲ್ಲಿ ಅನುಭವಿಸಿದ “ನೋವು” ಎಂದು ಪದೇ ಪದೇ ಪ್ರಸ್ತಾಪಿಸಿದರು.  ಆ “ನೋವು ಏನು ಎಂದು ವಿವರಿಸುವುದಿಲ್ಲ” ಎಂದು ಹೇಳಿದರು.  ವಿವರಿಸಲು ಇಷ್ಟವಿರದ ವಿಚಾರವನ್ನು ಪ್ರಸ್ತಾಪಿಸುವುದಾದರೂ ಯಾಕೆ ಎಂಬ ಪ್ರಶ್ನೆ ಅನೇಕರಲ್ಲಿ ಎದ್ದಿರುವಂತೆ ಕಂಡಿತು.  ತಮ್ಮ ಪ್ರತಿಕ್ರಿಯೆಯ ಉದ್ದಕ್ಕೂ “ನಾನು ಪ್ರಧಾನಿ ಆಗಿದ್ದಾಗ ತೆಗೆದುಕೊಂಡ ನಿರ್ಧಾರಗಳನ್ನು ಯಾರೂ ಸ್ಮರಿಸುವುದಿಲ್ಲ,  ನಾನು ಕರ್ನಾಟಕಕ್ಕೆ ಅನುಕೂಲವಾಗುವ ಅನೇಕ ನಿರ್ಧಾರಗಳನ್ನು ತೆಗೆದುಕೊಂಡೆ.  ಅದರ ಹೆಸರು ಬೇರೆಯವರಿಗೆ ಸಿಕ್ಕಿತು” ಎಂದು ಹಲುಬಿದರು. ದೇವೇಗೌಡರ ಇಳಿವಯಸ್ಸಿನ ಪ್ರತಿಕ್ರೆಯೆಯಿಂದ ಇನ್ನೂ ಹೆಚ್ಚಿನದನ್ನು ನಿರೀಕ್ಷಿಸಿದ ನಮ್ಮದೂ ತಪ್ಪಿರಬಹುದು.  ಅವರ ೮೫ ನೇ ಹುಟ್ಟಿದ ಹಬ್ಬದ ಪ್ರಯುಕ್ತ ಅನೇಕರು ಅವರನ್ನು ಸನ್ಮಾಸಿದರು. ಕಾರ್ಯಕ್ರಮದುದ್ದಕ್ಕೂ ಅವರನ್ನು ಎಲ್ಲರೂ ಹೊಗಳುವವರೇ ಆಗಿದ್ದರು. ಯಾರೂ ಸಹ ಪ್ರಾದೇಶಿಕ ಪಕ್ಷಗಳು ತಮ್ಮ ಜವಾಬ್ದಾರಿಯನ್ನು ನಿರ್ವಹಿಸದೇ ಹೋದ ಯಾವ ಸಂದರ್ಭವನ್ನೂ ನೆನಸಿಕೊಳ್ಳಲಿಲ್ಲ.  ಪ್ರಾದೇಶಿಕ ಪಕ್ಷಗಳು ಪ್ರಸ್ತುತವಾಗಬೇಕಾದರೆ ಏನು ಮಾಡಬೇಕು ಎಂದು ಪರಿಹಾರಗಳನ್ನು ಹೇಳಲಿಲ್ಲ.  ಈ ಕೊರತೆಗಳ ಮಧ್ಯೆ ಯುವಕರ ಸಮೂಹವೊಂದು ಕರ್ನಾಟಕದ ಪರ ಯೋಚನೆಗಳನ್ನು ಮಾಡುತ್ತಾ,  ಕರ್ನಾಟಕದ ಹಿತವನ್ನು ಕಾಯಲು ಸಂಘಟಿತ ಪ್ರಯತ್ನದ ಮುನ್ನುಡಿ ಬರೆಯುತ್ತಿದ್ದಾರೆ ಎಂಬ ಆಶಾ ಭಾವನೆ ಎಲ್ಲರಲ್ಲೂ ಇತ್ತು.  

                

Advertisements

Please have your say

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s